close
| 在初信的頭幾年，我在信仰上最主要的推動力是人的注意和讚賞。當我做某件善行，我想著的是：某某見唔見到我咁愛主。 ９７年是我信仰方向上一個戲劇性的扭轉。那段時候，除了亞伯拉罕的信心，另一套我緊緊抓著，重聽又重聽的信息是：摩西詩篇２０３－２０６法利賽人的義。 「重生的人有神的知覺。 佢對神的同在有好強的知覺，無論返工，玩，訓覺。因為佢有另一個知覺見到靈界，見到神的國。 呢個人日常尋找討神喜悅多過想偽善，因為佢知道係邊度神都睇到佢。甚至佢施捨，做每樣野，佢都諗：神睇住，神係度。 但屬魂的人禁食的時候，有意無意俾人知，你的私心都想俾人知。你返教會領詩，崇拜，你係當中屈膝，禱告，你係做俾人睇。呢D唔會令你更親近神。 你係做善事犯罪，係你憐憫，慷慨背後，你一個貪婪，驕傲的奴隸，想SHOW俾人睇你可以禁食耐D，信仰唔係使你得釋放。 因為屬魂的人淨係有人的知覺，魂係識朋友的知覺。 但屬靈的人，尤其當佢行善，禱告，佢神的知覺就越強，佢直情唔介意有冇人望見，佢甚至唔記得行過多少善事。 信仰如果係人世間真係有任何意義，信仰係為左讓你更加親近神，認識神。但有D人，佢日常生活已經直接認識人，講到信仰，佢都掛住間接利用宗教認識人，間接等人讚佢，間接討好人。呢D人完全屬魂，唔識用佢的靈。 領袖有個好大的試探：故意做俾人睇。 故意做俾人睇就係係信仰上出貓，想快D有果效，但係冇真材實料。 有D領袖會用好多好屬靈既理由解釋點解做俾人睇：做個榜樣麻，見證神麻．．． 其實佢係呢個人生試場上追唔上，就出貓。 當你了解神，你就唔會加速自己屬靈的高昇。 「他們已經得了他們的賞賜」係一個好大的咒詛。 舉個例：約瑟從來冇得佢身邊人的幫助，反而不斷俾人害。每一次約瑟做D啱既野，應該係人讚佢，尊榮佢，但佢都得唔到獎賞。 係我地人生當中，我地應該得到獎賞，得人讚，得人應同的時候，你就係得唔到。 但如果你了解神，你就知，神讓你咁經歷佢係佢唔想你仰望人，仰望人地的手好似等人施捨。約瑟一生只可以仰望神，佢一生冇一個人唔令佢失望。 但係當你了解神，你知道，約瑟一生裡面的獎賞，神從來冇忘記，不過係神既帳簿計緊利息。如果約瑟一早得到佢想得到的野，佢最多早兩年出監，佢唔會做宰相。所以法利賽人「已經得了他們的賞賜」係幾大的咒詛！ 你故意做，你得到你想要的野，你唔駛等，但亦係得咁多，冇喇！ 好似射丫叉，當你將粒石仔向後拉，你唔放住，向後拉，再向後拉， 一放就射得好遠。 約瑟係得得遲，但佢失去的，神全部一次過俾返佢。 但法利賽人嫌慢！冇錯，「故意」可以產生即時果效，即時人地睇得起你，但你記住：人俾你的高昇人可以拿返。你每樣野都係人俾你，你每日心驚膽跳，驚有人叻過你。 你人生好多DRAWBACK只係利疊利。 係我一生中試過好多次俾神拉後，但神一釋放出黎，冇人可以拿走。 係我初信主的時候其實我真係有機會因為模仿人，而係我信主歷程中導致一個瑕疵。結果當我信左主第一兩年之後，神好特別讓我去左外國讀書。跟住我係外國流離浪蕩周圍流浪，係呢度讀下書，又係呢度讀下書，直到我返黎香港之前，我都係孤單一個人。 就係係呢段時間冇人影響我，我的信仰就真係我，單單就係我自己去倚靠神。我的禱告唔係做俾人睇。 我發覺呢段時間裡面，我所做既每一樣野神都去計算。 冇人可以用佢的財富震撼神，但歷史上好多人用佢純正的動機震撼神。 真正你默默係神面前付出，係神面前傾心吐意，就算一個小錢，都令佢震撼。 我曾經覺得自己好失敗，我覺得自己又冇讀神學院，我又冇做呢D，又冇做果D，我邊有機會做一個好的屬靈領袖丫，我都冇野教到俾人。 但其實，就好似我淨話所講，只有法利賽人先需要咁多知識架。 真正的信仰根本就係，腳踏實地，好簡單的做出黎。」 雖然我深知，神的話能夠改變人的一生，但剛才當我拿出這些微黃的筆記（９８年３月做的）重溫的時候，還是再一次被震撼！ 當中每一段說話對我過去六年信仰造成的影響，是當日的我絕對無法想像的。如果不是這些神的話使我的信仰１８０度轉向，今天你看見的赤誠，會是信仰上最大的悲劇──一個信主多年，卻與神沒有關係的法利賽人。 感謝神，在我信仰還年幼的時候，我選擇了重新開始我的信仰，從認識人，轉為認識神。那時我的方法是很激進（即是極端）的，導致現在我要努力補回與人溝通，表達（認識人）上的技巧，但是．．．如果讓我再次選擇，毫無疑問，我仍舊會選擇這個方向。 今早我和同屋Superwoman（呵呵，她倆不知道這個網址）在廚房煮食的時候，她忽然對我說：「赤誠，我覺得你最近唔同左好多！」 「係咩？」 「係好左個種，遮我唔係話你之前唔好，不過我發覺你改變左所以想話俾你聽。」 其實能夠每天發掘到新的真理，並且看見自己一天一天改善，本身已經讓我有極大的快樂和動力。並且我也早已習慣神每次延遲但利疊利的回應。所以我沒有想過，這次會立即得到人的讚賞。（前事請看４月２１日那篇「與人相處的智慧」） 同屋已經轉身出了廚房，我才反應過來，略為不知所措地說：「多謝你的鼓勵，相信黎緊會做得更加好啦。」 當然，偶然有人讚一下還是很開心的 Original posted on 2004年5月9日 |
全站熱搜
留言列表
